
កម្ពុជា-អឺរ៉ុប រួមគ្នាជំរុញឱ្យប្រើប្រាស់ថាមពលកកើតឡើងវិញក្នុងវិស័យឧស្សាហកម្ម ដើម្បីប្រកួតប្រជែងការវិនិយោគ តាមរយៈការទទួលយកទីផ្សារ ក្នុងការនាំចេញរយៈពេលវែងរបស់កម្ពុជា
ភ្នំពេញ៖ កម្ពុជា-អឺរ៉ុប បានប្រកាសដាក់ឱ្យអនុវត្តជាផ្លូវការលើកដំបូងនៃកម្មវិធី «ភាពជាដៃគូរវាងសហភាពអឺរ៉ុបសម្រាប់ការប្រើប្រាស់ថាមពលប្រកបដោយចីរភាព ក្នុងវិស័យឧស្សាហកម្ម»។ ខណៈដែលសហភាពអឺរ៉ុបកំពុងគាំទ្រការផ្លាស់ប្តូរបៃតងនេះ តាមរយៈកម្មវិធីនេះមានគោលបំណងជំរុញការវិនិយោគលើប្រសិទ្ធភាពថាមពល និងថាមពលកកើតឡើងវិញសម្រាប់វិស័យកាត់ដេរ ស្បែកជើង និងទំនិញធ្វើដំណើរ (GFT) រួមទាំងជីវម៉ាសប្រកបដោយចីរភាព និងប្រព័ន្ធសូឡាលើដំបូល។
ភ្នំពេញ៖ កម្ពុជា-អឺរ៉ុប បានប្រកាសដាក់ឱ្យអនុវត្តជាផ្លូវការលើកដំបូងនៃកម្មវិធី «ភាពជាដៃគូរវាងសហភាពអឺរ៉ុបសម្រាប់ការប្រើប្រាស់ថាមពលប្រកបដោយចីរភាព ក្នុងវិស័យឧស្សាហកម្ម»។ ខណៈដែលសហភាពអឺរ៉ុបកំពុងគាំទ្រការផ្លាស់ប្តូរបៃតងនេះ តាមរយៈកម្មវិធីនេះមានគោលបំណងជំរុញការវិនិយោគលើប្រសិទ្ធភាពថាមពល និងថាមពលកកើតឡើងវិញសម្រាប់វិស័យកាត់ដេរ ស្បែកជើង និងទំនិញធ្វើដំណើរ (GFT) រួមទាំងជីវម៉ាសប្រកបដោយចីរភាព និងប្រព័ន្ធសូឡាលើដំបូល។
ពិធីនេះត្រូវបានធ្វើឡើងក្រោមវត្តមានរបស់លោក កែវ រតនៈ រដ្ឋមន្ត្រីក្រសួងរ៉ែ និងថាមពល, លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, លោក អ៊ីហ្គ័រ ទ្រីសម៉ាន់ ឯកអគ្គរដ្ឋទូតសហភាពអឺរ៉ុបប្រចាំកម្ពុជា នៅថ្ងៃទី១៩ ខែវិច្ឆិកា ឆ្នាំ២០២៦ រាជធានីភ្នំពេញ។
លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងថា វិស័យកាត់ដេរ ផលិតស្បែកជើង និងផលិតផលធ្វើដំណើរ (GFT) នេះគឺជាស្នូលនៃសេដ្ឋកិច្ចឧស្សាហកម្មកម្ពុជា ប៉ុន្តែកំពុងប្រឈមនឹងសម្ពាធអន្តរជាតិកាន់តែខ្លាំងឡើង ក្នុងការលើកកម្ពស់ប្រសិទ្ធភាពថាមពល និងកាត់បន្ថយការបំភាយឧស្ម័ន ដើម្បីបំពេញតម្រូវការរបស់អ្នកបញ្ជាទិញសកល។ គំនិតផ្តួចផ្តើមនេះ នឹងត្រូវបានវាស់វែងយ៉ាងតឹងរ៉ឹងតាមរយៈការកាត់បន្ថយថាមពល និងការបំភាយឧស្ម័នជាក់ស្តែង និងការរក្សាបាននូវភាពប្រសើរឡើង។
លោករដ្ឋមន្ត្រីបន្តថា វិស័យនេះបានកើនឡើងពីប្រមាណ ៩,៧ ពាន់លានដុល្លារក្នុងការនាំចេញនៅឆ្នាំ២០២០ ដល់ជិត ១៦ ពាន់លានដុល្លារនៅឆ្នាំ២០២៥ និងរក្សាសន្ទុះរឹងមាំជាមួយនឹងកំណើនជាង ៧% ក្នុងរយៈពេល ១០ ខែដំបូងនៃឆ្នាំនេះ វិស័យនេះបានទ្រទ្រង់ជីវភាពរស់នៅ ដោយផ្តល់ការងារដល់ប្រជាជនកម្ពុជា ១,១ លាននាក់ ជាពិសេសស្ត្រី។
លោករដ្ឋមន្ត្រី គូសបញ្ជាក់ថា ទោះជាយ៉ាងណាក៏ដោយ ស្ថានភាពនៃទិដ្ឋភាពពាណិជ្ជកម្មអន្តរជាតិ កំពុងឆ្លងកាត់ការផ្លាស់ប្តូររចនាសម្ព័ន្ធដ៏សំខាន់ ស្របពេលដែលខ្សែសង្វាក់តម្លៃសកល និងទីផ្សារនាំចេញធំៗ កំពុងពង្រឹងការអនុលោមតាមបទដ្ឋានតឹងរ៉ឹងលើចីរភាពសាជីវកម្ម តម្លាភាពនៃការបំភាយកាបូន និងការកាត់បន្ថយកាបូនក្នុងខ្សែសង្វាក់ផ្គត់ផ្គង់។ អ្នកបញ្ជាទិញអន្តរជាតិរបស់យើងទាមទារភស្តុតាងនៃការប្រើប្រាស់ថាមពលទាប និងការបំភាយឧស្ម័នទាប ខណៈថ្លៃថាមពលកំពុងសង្កត់ធ្ងន់លើរោងចក្ររបស់យើង។
លោករដ្ឋមន្ត្រី បន្ថែមថា កំដៅនៅកន្លែងធ្វើការប៉ះពាល់ដល់សុខភាពកម្មករ និងផលិតភាពនៃខ្សែសង្វាក់ផលិតកម្មរបស់យើង។ រោងចក្រដែលឆ្លើយតបទៅនឹងការផ្លាស់ប្តូរទាំងនេះ នឹងរក្សាបាននូវភាពប្រកួតប្រជែងខ្ពស់ជាងមុន ចំណែករោងចក្រដែលមិនឆ្លើយតប នឹងបាត់បង់ការបញ្ជាទិញ។ វាជាកត្តាកំណត់ស្នូលនៃភាពប្រកួតប្រជែងក្នុងការនាំចេញរយៈពេលវែងរបស់កម្ពុជា ការទទួលយកទីផ្សារ និងភាពធន់នៃឧស្សាហកម្ម។
លើសពីនេះ លោករដ្ឋមន្ត្រី អំពាវនាវដល់ធនាគារពាណិជ្ជ និងអ្នកវិនិយោគ ឱ្យណែនាំផលិតផលហិរញ្ញវត្ថុបៃតង ដែលកៀរគរដើមទុនសម្រាប់គម្រោងប្រសិទ្ធភាពដែលបានផ្ទៀងផ្ទាត់រោងចក្រដែលមានប្រសិទ្ធភាពថាមពលទាំងនេះ គឺជាសហគ្រាសដែលមានភាពប្រកួតប្រជែងខ្ពស់ជាងមុនយ៉ាងពិតប្រាកដ។ លោករដ្ឋមន្ត្រី លើកទឹកចិត្តឱ្យវិនិយោគិនចុះបញ្ជីរោងចក្ររបស់ខ្លួន ដើម្បីទទួលបានផលប្រយោជន៍ពីគម្រោងនេះ តាមរយៈការអំពាវនាវដល់អ្នកបញ្ជាទិញអន្តរជាតិ ឱ្យផ្តល់ការលើកទឹកចិត្តដល់អ្នកផ្គត់ផ្គង់ដែលចូលរួម និងរួមវិនិយោគក្នុងការសម្របខ្លួននៅកន្លែងធ្វើការទាំងនេះ។
ក្នុងឱកាសនោះដែរ លោក អ៊ីហ្គ័រ ទ្រីសម៉ាន់ ឯកអគ្គរដ្ឋទូតសហភាពអឺរ៉ុបប្រចាំកម្ពុជា លើកឡើងថា វិស័យ GFT គឺជាសសរស្តម្ភនៃសេដ្ឋកិច្ចកម្ពុជា ដោយផ្តល់ចំណូលពីការនាំចេញ និងការងារដល់ប្រជាជនប្រមាណ ៣ លាននាក់ ទាំងដោយផ្ទាល់ និងដោយប្រយោល ខណៈដែលភ្ជាប់អាជីវកម្ម និងកម្មករកម្ពុជាទៅកាន់ទីផ្សារសកល។ វាគឺអំពីការពង្រឹងភាពប្រកួតប្រជែង ការគាំទ្រការផ្លាស់ប្តូរពណ៌បៃតង និងការកសាងភាពធន់ ខណៈដែលកម្ពុជាកំពុងត្រៀមខ្លួនចាកចេញពីក្រុមប្រទេសអភិវឌ្ឍន៍តិចតួច (LDC)។ ប្រសិទ្ធភាពថាមពលគឺចាំបាច់សម្រាប់ការអភិវឌ្ឍឧស្សាហកម្មបៃតង និងភាពប្រកួតប្រជែងនាពេលអនាគតនៃវិស័យឧស្សាហកម្មរបស់កម្ពុជា។
លោកឯកអគ្គរដ្ឋទូតបន្តថា អ្នកទិញ និងអ្នកវិនិយោគអន្តរជាតិកាន់តែរំពឹងទុកនូវការអនុវត្តផ្នែកបរិស្ថានកាន់តែរឹងមាំ ខណៈដែលក្រុមហ៊ុនផលិតប្រឈមមុខនឹងសម្ពាធជាប់លាប់ក្នុងការកាត់បន្ថយថ្លៃដើម លើកកម្ពស់គុណភាព និងបង្កើនផលិតភាព។ នៅក្នុងបរិបទនេះ ប្រសិទ្ធភាពថាមពលមិនមែនគ្រាន់តែជាវិធានការបរិស្ថាននោះទេ វាគឺជាអាទិភាពអាជីវកម្ម ហើយជាមធ្យោបាយមួយដ៏លឿន និងមានប្រសិទ្ធភាពបំផុតសម្រាប់ក្រុមហ៊ុនផលិតនៅកម្ពុជា ក្នុងការកាត់បន្ថយថ្លៃដើម លើកកម្ពស់ផលិតភាព និងជំរុញការផ្លាស់ប្តូរពណ៌បៃតង។
លោកឯកអគ្គរដ្ឋទូត គូសបញ្ជាក់ថា ការគ្រប់គ្រងថាមពលកាន់តែប្រសើរ និងដំណើរការផលិតកម្មកាន់តែឆ្លាតវៃ អាចកាត់បន្ថយវិក្កយបត្រអគ្គិសនី លើកកម្ពស់ផលិតភាព និងកាត់បន្ថយការបញ្ចេញឧស្ម័ន។ ពួកវាក៏អាចជួយរោងចក្រនៅកម្ពុជាឆ្លើយតបទៅនឹងការរំពឹងទុកផ្នែកនិរន្តរភាពដែលកំពុងវិវត្ត និងរក្សាភាពប្រកួតប្រជែងនៅក្នុងខ្សែសង្វាក់ផ្គត់ផ្គង់អន្តរជាតិ។
លោកឯកអគ្គរដ្ឋទូត បន្ថែមថា ការផ្លាស់ប្តូរថាមពលគឺមានសារៈសំខាន់បំផុតសម្រាប់ភាពជោគជ័យរបស់កម្ពុជា ក្នុងការចាកចេញពីស្ថានភាពប្រទេសអភិវឌ្ឍន៍តិចតួច។ យើងដឹងហើយថា កម្ពុជាសម្រេចបាននូវវឌ្ឍនភាពសេដ្ឋកិច្ច និងសង្គមគួរឱ្យកត់សម្គាល់ ហើយការចាកចេញពី LDC គឺជាព្រឹត្តិការណ៍ប្រវត្តិសាស្ត្រថ្នាក់ជាតិដ៏សំខាន់មួយ។ ប៉ុន្តែការចាកចេញនេះមិនមែនជាទីបញ្ចប់នៃដំណើរនោះទេ វាគឺជាការចាប់ផ្តើមនៃដំណាក់កាលថ្មីនៃការអភិវឌ្ឍ ដែលការរក្សាកំណើនតម្រូវឱ្យមានសេដ្ឋកិច្ចដែលមានភាពចម្រុះ ផលិតភាព និងភាពធន់ជាងមុន។
បើតាមលោក កែវ រតនៈ រដ្ឋមន្ត្រីក្រសួងរ៉ែ និងថាមពល ថ្លែងថា យើងត្រូវធ្វើឱ្យមានការប្រើប្រាស់អគ្គិសនីក្នុងវិស័យដឹកជញ្ជូន ឧស្សាហកម្ម កសិកម្ម និងវិស័យផ្សេងៗទៀត គោលបំណងគឺដើម្បីប្រើប្រាស់ថាមពលស្អាត កាត់បន្ថយការពឹងផ្អែកលើឥន្ធនៈហ្វូស៊ីល និងបង្កើតភាពប្រកួតប្រជែងមួយប្រភេទដែលវិស័យឧស្សាហកម្មស័ក្តិសមនឹងទទួលបាន ព្រមទាំងផ្តល់ការយកចិត្តទុកដាក់ជាថ្មីចំពោះការគ្រប់គ្រង និងថែរក្សាបរិស្ថាន។ យើងបានធ្វើដូច្នេះដោយមានទំនុកចិត្តលើអ្វីដែលបច្ចេកវិទ្យាស្អាតជាងមុន និងមានប្រសិទ្ធភាពជាងមុនអាចផ្តល់ជូន ដែលគោលនយោបាយប្រសិទ្ធភាពថាមពលជាតិរបស់យើងឆ្លុះបញ្ចាំងពីចក្ខុវិស័យដូចគ្នានេះ។
លោករដ្ឋមន្ត្រី កែវ រតនៈ គូសបញ្ជាក់ថា សហភាពអឺរ៉ុបបានក្លាយជាទីផ្សារដ៏សំខាន់សម្រាប់អ្នកផលិតកម្ពុជា អស់រយៈពេលជាយូរមកហើយ ដូច្នេះភាពជោគជ័យនៃវិស័យនេះ មានសារៈសំខាន់ចំពោះប្រជាជនកម្ពុជារាប់រយពាន់នាក់ ដែលភាគច្រើនជាស្ត្រីដែលការងាររបស់ពួកគេគាំទ្រដល់ក្រុមគ្រួសារ និងសហគមន៍ទូទាំងប្រទេស។ ដូច្នេះការកែលម្អទាំងនេះអាចគាំទ្រដល់សុខភាព និងសុខុមាលភាពរបស់កម្មករ ដោយផ្តល់ផលប្រយោជន៍ដល់ផលិតភាពលើការវិនិយោគផ្នែកប្រសិទ្ធភាព រោងចក្រគួរតែគិតគូរទាំងការសន្សំសំចៃថាមពល និងផលប្រយោជន៍ពីកម្មវិធីនេះ។
លោករដ្ឋមន្ត្រីបន្ថែមថា កម្ពុជានឹងត្រូវផ្លាស់ទីឡើងកាន់តែខ្ពស់នៅក្នុងខ្សែសង្វាក់តម្លៃ ពង្រឹងសមត្ថភាពផលិតភាព និងទាក់ទាញការវិនិយោគលើសកម្មភាពសេដ្ឋកិច្ចដែលមានតម្លៃខ្ពស់ជាង និងមាននិរន្តរភាពជាងមុន ដែលទាមទារឱ្យមានថាមពលដែលមានតម្លៃសមរម្យ ជាពិសេសនៅពេលដែលការផលិតកាន់តែមានស្វ័យប្រវត្តិកម្ម កាន់តែប្រើប្រាស់អគ្គិសនីច្រើន និងកាន់តែប្រើប្រាស់ថាមពលខ្លាំងនៅទូទាំងខ្សែសង្វាក់តម្លៃ។
សូមជម្រាបថា វិស័យកាត់ដេរ ស្បែកជើង និងទំនិញធ្វើដំណើរ (GFT) គឺជាកម្លាំងចលករសំខាន់មួយនៃសេដ្ឋកិច្ចកម្ពុជា ជាវិស័យដែលផ្តល់ការងារច្រើនជាងគេ ជាពិសេសដល់កម្មករនារី ហើយបច្ចុប្បន្នមានចំណែកប្រហែលពីរភាគបីនៃការនាំចេញទំនិញរបស់ប្រទេស។ ដើម្បីរួមចំណែកដល់កំណើនបៃតង និងការបង្កើតការងារសមរម្យ វិស័យនេះមានសក្តានុពលក្នុងការប្រែក្លាយទៅជាវិស័យផលិតកម្មដែលមានភាពបៃតង និងមានសមត្ថភាពប្រកួតប្រជែងខ្ពស់ ស្របតាមស្តង់ដារចីរភាពដែលទីផ្សារអន្តរជាតិសំខាន់ៗ ដូចជាសហភាពអឺរ៉ុប (EU) តម្រូវ៕