ភ្នាក់ងារ E-16-222វាយតម្លៃ V-24-003
Royal 5G
MMT

ផ្សាយថ្ងៃ:

← ត្រលប់ទៅរបាយការណ៍
រកលុយបាន… តែដឹងទេថាអ្វីខ្លះជាប្រាក់ចំណូលជាប់ពន្ធ?

រកលុយបាន… តែដឹងទេថាអ្វីខ្លះជាប្រាក់ចំណូលជាប់ពន្ធ?

ពន្ធលើប្រាក់ចំណូល គឺជាកាតព្វកិច្ចសំខាន់មួយ ដែលទាមទារឱ្យអ្នកជាប់ពន្ធយល់ដឹងច្បាស់អំពីច្បាប់ពន្ធដារ ដើម្បីគណនា ប្រកាស និងបង់ពន្ធឱ្យបានត្រឹមត្រូវ។

ភ្នំពេញ៖ ពន្ធលើប្រាក់ចំណូល គឺជាពន្ធស្នូលមួយក្នុងប្រព័ន្ធពន្ធដារ ដែលទាមទារឱ្យអ្នកជាប់ពន្ធ និងភ្នាក់ងារសេវាកម្មពន្ធដារ មានការយល់ដឹងច្បាស់លាស់អំពីច្បាប់ និងលិខិតបទដ្ឋានគតិយុត្តស្តីពីពន្ធដារ ដើម្បីគណនា ប្រកាស និងបង់ពន្ធឱ្យបានត្រឹមត្រូវ និងតាមពេលវេលា។

ក្នុងអំឡុងពេលនៃការប្រកាស និងបង់ពន្ធលើប្រាក់ចំណូលប្រចាំឆ្នាំ កាលពីថ្ងៃទី១៥ ខែមករា ឆ្នាំ២០២៦ កម្មវិធី “ពន្ធដារកម្ពុជា” ដែលផ្សាយផ្ទាល់លើទំព័រ Facebook ផ្លូវការរបស់អគ្គនាយកដ្ឋានពន្ធដារ បានលើកយកប្រធានបទ “ពន្ធលើប្រាក់ចំណូល (ប្រាក់ចំណូលជាប់ពន្ធ)” មកធ្វើបទបង្ហាញ និងពិភាក្សា។

កម្មវិធីនេះមានការចូលរួមពី

  • លោក ហេង សុវណ្ណារ័ត្ន អនុប្រធាននាយកដ្ឋានសវនកម្មសហគ្រាស ជាវាគ្មិន
  • លោកស្រី ហួត វណ្ណៈ អនុប្រធានការិយាល័យនៃនាយកដ្ឋានរដ្ឋបាល និងកិច្ចការទូទៅ ជាអ្នកសម្របសម្រួល

តើ “ប្រាក់ចំណូលជាប់ពន្ធ” មានន័យដូចម្តេច?

វាគ្មិនបានបញ្ជាក់ថា ពន្ធលើប្រាក់ចំណូល គឺជាកាតព្វកិច្ចរបស់អ្នកជាប់ពន្ធ ដែលមានប្រាក់ចំណូលជាប់ពន្ធទទួលបានក្នុងឆ្នាំជាប់ពន្ធ។

  • អ្នកជាប់ពន្ធ និវាសនជន ត្រូវបង់ពន្ធលើប្រាក់ចំណូលពីប្រភពក្នុងស្រុក និងបរទេស
  • អ្នកជាប់ពន្ធ អនិវាសនជន ត្រូវបង់ពន្ធលើប្រាក់ចំណូលពីប្រភពក្នុងប្រទេសកម្ពុជា

ប្រាក់ចំណូលជាប់ពន្ធ សំដៅដល់ប្រាក់ចំណូលសុទ្ធ ដែលកើតចេញពីលទ្ធផលនៃប្រតិបត្តិការអាជីវកម្មគ្រប់ប្រភេទ បូករួមទាំង៖

  • ចំណេញមូលធន
  • ការប្រាក់
  • ថ្លៃឈ្នួល សួយសារ និងសំណងផ្សេងៗ
  • ប្រាក់ចំណូលពីទ្រព្យសកម្មហិរញ្ញវត្ថុ និងទ្រព្យសកម្មវិនិយោគ រួមទាំងអចលនទ្រព្យ

និយាយឱ្យងាយយល់ ប្រាក់ចំណូលជាប់ពន្ធ គឺជាលទ្ធផលនៃ ការកាត់កងរវាងចំណូលដុល និងចំណាយទាំងអស់ ដែលកើតឡើងក្នុងអំឡុងពេលដំណើរការអាជីវកម្ម ឬនៅពេលបញ្ចប់អាជីវកម្ម។

ការបែងចែកប្រភេទចំណូលសម្រាប់គោលដៅពន្ធដៅពន្ធ

ចំណូលត្រូវបានបែងចែកជា ៣ប្រភេទសំខាន់ៗ ៖

១-ចំណូលពីសកម្មភាពអាជីវកម្មជាចំណូលដែលបានពីការផ្គត់ផ្គង់ទំនិញ ឬសេវាកម្ម ដែលបានបញ្ជាក់នៅលើបណ្ណពន្ធប៉ាតង់ រួមទាំងការយកទំនិញ ឬសេវា មកប្រើប្រាស់ផ្ទាល់ខ្លួន។

២-ចំណូលបន្ទាប់បន្សំរួមមានចំណូលពី៖

  • ការជួលអចលនទ្រព្យ
  • ការដាក់អចលនទ្រព្យឱ្យតតិយជន ឬនិយោជិតប្រើប្រាស់ដោយឥតគិតថ្លៃ
  • សួយសារ
  • ការលក់កាកសំណល់
  • ការជួលសម្ភារអាជីវកម្ម
  • ប្រាក់ចំណូលពីសំបកវិចខ្ចប់ជាដើម

៣-ចំណូលផ្សេងៗរួមមាន៖

  • ចំណូលពីមូលបត្រ ភាគហ៊ុន និងភាគលាភ
  • ចំណូលហិរញ្ញវត្ថុ
  • ចំណូលពីសកម្មភាពសម្រាប់ប្រយោជន៍បុគ្គលិក
  • អំណោយ និងឧបត្ថម្ភធន
  • និងប្រភេទចំណូលផ្សេងៗទៀត

គួរបញ្ជាក់ថា ការយល់ដឹងច្បាស់អំពីប្រភេទចំណូល និងប្រាក់ចំណូលជាប់ពន្ធ គឺជាគន្លឹះសំខាន់ក្នុងការគោរពច្បាប់ពន្ធដារ និងបង្កើនភាពត្រឹមត្រូវក្នុងការប្រកាសពន្ធ៕

ដោយ៖ មឿន ឌីណា (Moeun Dyna)